Tarinoita ja
kylähistoriaa


Tähän sivuston osaan on talletettu entisten ja nykyisten Sieppijärvisten ajatuksia ja tarinoita. Historian havinaakin jutuista löytää. Juttu sinällään on joko kerrottua tai kirjoitettua historiaa.  Jos Sinulla on kylään liittyviä muistoja tai tarinoita joiden yhdistävä tekijä on Sieppijärven kylä niin julkaisemme ne mielellämme näillä sivuilla.

Lähetä oma juttusi. eMail: ariunga[at]pp.inet.fi

Kylän sianti - meä omala murtheela

Tiäkkö!

Son tämä meän Siepijärven kylä yli neljänsaan asukhaan kylä. Sieppijärvi siottuu läntisseen Laphiin Torniojokivartheen, vaikka ei aivan kysseisen joen ranthaan ylläkhään. Täälä met asustelemma suurimaksi osaksi omissa taloissa kahen kauhniin vaaran valissä - sieppuvaaran ja käkivaaran. Torniojokheen on matkaa linnuntietä pitkin jotaki kolmettoista kilometriä. Son tämä meän kylä niinkö ithään käsin Torniojoesta. Ko sie tulet Torniojoesta käsin sie jouvut tulheen isoitten vaaroitten yli joista issoin on sieppuvaara. Sen päältä sie sitte näekki aika laajale aluheele ja ko sie kattot ithään, sie näet käkivaaran ja siinä näitten vaarojen välissä sitte leppääki Sieppijärven komea kylä.

Sieppijärven kylhään tullee matkaa Torniosta (ko lähethään pohjosseen käsin) jotaki sataseitkytä kilometriä Kilpisjärvele menevää tietä pitkin - son valtatie 21. Tie korjathiin hyvhään kunthoon muutama vuosi sitte. Pellosta tullee vielä matkaa nelkytä kilometriä. Son muuten Sieppijärven kylä, josta Yllästunturi näkkyy ensmäisen kerran ko ajethaan tulheen etelästä käsin. Ylläksele meän kylästä on jotaki kuuskytä kilometriä. Kolahriin, joka on meän kunnan napapaikka tullee matkaa parikytä kilometriä, seki pohjosseen käsin. Paljon sitä ajehlaan muualekki tästä meän kylän kautta.

Tämä meän kylä on saanu nimensä Sieppiäijästä, joka tuli justhiin nuitteen eelä mainittujen vaaroitten yli Köngäsen ruukilta, hakehmaan hyviä kala- ja mettästysmaita. Köngäsen ruukki muuten siaittee lähelä Pajalaa, son kylä ruottin puolela. Son se sama kylä jossa Lestaadius piti kovia puhheita viime vuosisaala. Niin - tuo Sieppiäijä tuli tähän kylhään joskus tuhakuussattaa luvula.

Äijä löysiki hyän ja kalasan järven. Täälä se pyyteli lohta ja rautua nii ja rökhäitä kans. Äijästä son tämä kylä saanu nimensäkki, elikkä Sieppijärvi. Tuohon kyläranthaan se pani kotansa pysthöön, johonki nykysen Rantalan talon paikale, aikasemmin tuola paikala oli Satan talo.

Ko kattothaan takappäin tätä meänki kylän historiaa niin sielä ussein mainithaan Satan, Pääkkölän, Filpan, Kurun, Iivarin, Kankhaan, Kulluvaaran, Jussin ja Rovan nimet. Tuo Satan suku on aikojen kuluessa muuttunu osaksi Vaattovaaraksi, kyllä Sattaki sukunimien joukosta löytyy, ei sillä..

Koulussaki ko joskus kysythään laskentotunnilla että kuisson ko on kaksattakuus jussia ja yks iivari niin montako son sitte yhtheensä - harva ossaa vastata että son yheksän.

Kolarin kotiseutumuseo, son entinen pääkön pirtti, joka jäiki ainoana saksalaisilta polttamatta toisen mailmansoan aikhaan. Pääkönpirtti siirethiin pääköntörmästä Jussin vainiolle ja siellä se on nykyhäänki ja hyässä kunnossa. Sitä piethäänki auki aina kesälä, että voivah nuorekki ja miksei vanhakki käyä kattomassa vanhoja esihneitä ja vehkeitä.

Tänhäänki kylässä ellää vahva mettästys- kalastus ja muu pyynthiin liittyvä perinne - taitaa olla peruja Sieppiäijän ajoilta. Samuli Paulaharjuki on kirjottanu kirhjaansa hurjia juttuja muummuassa sieppiläisten karhun kaaosta. Soli tosi väkevää vääntöä. Tämä tapahtu joskus viime vuosisaala.

Monele aluheen asukhaale mettä antaa eehleen elannon mettäntutkimus- ja kunnostamistöissä. Rahhaa met saama enniiten kuitekki matkailusta, joka aina jollaki tavala liittyy yllästunturhiin. Eli turisti tuopi tänne yhä enemän ja son hyä asia. Ei sillä - kyllä met ossaama ittekki täälä kylälä tehhä vaikka mitä. Uutena tapahtumana kylälä täytyy mainita joka kesä piettävä Rökästapahtuma ja uusia ajatuksia meän aluheen matkailun kehittämiseksi syntyy koko ajan lissää.

Aina ko sie ajelet tulheen pohjosesta tai etelästä käsin niin tähän kylhään kannattaa pysähtyä ja met kerroma sitte sulle lissää. Molema mukavia ihmisiä.

Kyläpäällikko:
   Kari Koivumaa
  0451227357[at]netti.fi
  0400 379061

Kyläsihteeri:
   Piritta Unga
  pirittaunga[at]gmail.com
  040 9122908

Nettisivuasiat:
   Ari Unga (admin)
   ariunga[at]pp.inet.fi
   0400 466897